Vital Fundazioko egungo presidentea proposatu dute jeltzaleek Gasteizko alkate izateko hautagai, eta orain alderdiaren barne-prozesuak berretsi beharko du hautagaitza.

Euzko Alderdi Jeltzaleak Jon Urresti proposatu du Gasteizko alkategai izateko 2027ko udal-hauteskundeetan. Gasteizko Buru Batzarren Artekoak, Araba Buru Batzarrarekin adostuta, gaur arratsaldean egin du proposamena.

59 urteko Lakuabizkarrako enpresari txikia da Urresti, eta azken hamar urteotan Vital Fundazioaren presidentea izan da. EAJk nabarmendu du ez duela inoiz kargu publikorik izan, ezta hauteskundeetara aurkeztu ere.

10 urte Vital Fundazioaren buru

Urrestik hamar urte daramatza Vital Fundazioaren presidente gisa. EAJren arabera, aldi horretan industria eta ekonomia arloko inbertsioak, kultur proiektuak eta kirolarekin lotutako ekimenak bultzatu ditu.

Alderdiak Talgo Arabara itzultzeko operazioa, Basquevolten egindako inbertsioak eta enpresa txiki eta ertainen aldeko jarduerak aipatu ditu. Kulturaren arloan, berriz, Arkabia sortzea nabarmendu du; kirolean, Estadioaren berritzea eta kirol-ekitaldietan Fundazioak izan duen parte-hartzea.

59 urte eta 1993an sortu zuen Gizaker

Urresti Deustuko Unibertsitatean Politika Zientzietan eta Soziologian lizentziatua da. Olabide ikastolan eta Ramiro de Maeztu eta Federico Baraibar institutuetan ikasi zuen.

1993an, unibertsitateko ikasketak amaitu eta gutxira, Gizaker enpresa sortu zuen.

EAJren arabera, Urresti pertsona «elkarrizketarako joera» duena da, eta Udalera iritsiz gero «elkarlanean oinarritutako» politika egiteko modu bat defendatuko luke. Alderdiak azpimarratu du ez dela politikari profesionala eta ez duela aurretik kargu publikorik bete.

Segurtasuna, etxebizitza eta ekonomia

Urrestik berak hautagaitza-proposamena onartu du, eta datozen urteetako Gasteizko hainbat erronka aipatu ditu: segurtasuna, etxebizitza, ekonomia, garbitasuna eta kalitatezko enplegua.

EAJk azaldu du Vital Fundazioaren bidez azken hamarkadan Gasteizen eta Araban egindako lana Udalera eramatea dela Urrestiren helburua.

Oraindik ez da behin betiko hautagaia

Proposamena ez da oraindik behin betiko hautagaitza. Gasteizko Buru Batzarren Artekoak proposamena onartu badu ere, Arabako hiriburuko alderdikideei helarazi zaie eta datozen asteetan lau uri-erakundeetan egingo den barne-prozesuan berretsi beharko dute.

Urresti 16 urte zituenetik dago EAJn afiliatuta eta Lakuako uri-erakundean dago afiliatuta. Ezkonduta dago eta bi seme-alaba ditu.