Hotel batean edo landetxe batean erreserba egin baduzu, adi WhatsApp bidez jasotzen dituzun mezuekin. Ertzaintzak ohartarazi du iruzur mota horren gorakada antzeman duela, eta dagoeneko 98 salaketa jaso dituela 2026ko apiriletik irailera.
Iruzurraren ondorioz salatutako kasuetan 57.000 eurotik gorako diru-galera izan da.
Mezuak benetakoa dirudi
Iruzurgileek normalean WhatsApp bidez jartzen dira harremanetan biktimarekin, hotelaren edo landetxearen izenean. Mezua jasotzen duenari esaten diote erreserba baieztatu edo egiaztatu behar duela iritsi aurretik, eta horretarako lotura bat bidaltzen diote.
Eta arriskutsua da, ez baita erraza izaten mezua faltsua dela jakitea, izan ere erreserbaren benetako datuak ager daitezke bertan, hala nola hotelaren izena, bezeroaren izena, sarrera eta irteera datak edo erreserbaren identifikazio-zenbakia.
Datu horiek hainbat modutan lortzen dituzte ziberdelitugileek: erreserba-plataformen aurkako zibererasoen bidez, hotel eta landetxeen webguneen aurkako erasoen bidez edo lapurtutako informazioa saltzen duten DLS (Data Leak Sites) atarien bidez.
Lotura irekitzean hasten da arazoa
Loturaren bidez, hotelaren webgunea imitatzen duen orri batera eramaten dute biktima. Bertan datu pertsonalak (NANa, esaterako) edo bankuko datuak sartzeko eskatzen diote.
Ondoren, egindako erreserbaren ordainketa egiteko eskatzen zaio, eta horrela lortzen dituzte dirua edo finantza-informazioa.
Zer egin horrelako mezua jasoz gero?
Ertzaintzak gomendio argiak eman ditu:
- Ez egin klik estekan eta ez erantzun mezuari.
- Egiaztatu erreserba hotelarekin zuzenean, webgune edo telefono ofizialaren bidez.
- Ez erabili mezuan bertan agertzen den telefono-zenbakia edo helbide elektronikoa.
- Ez eman datu pertsonalik edo bankuko daturik.
- Igorlea blokeatu eta mezua jakinarazi.
- Finantza-datuak eman badituzu, jarri harremanetan zure bankuarekin lehenbailehen.
- Iruzurraren biktima izan bazara, gorde mezuak, ordainketen frogak eta gainerako ebidentziak, eta joan Ertzaintzaren edozein komisariatara salaketa jartzera.
Ertzaintzak azpimarratu du, beraz, benetako erreserba bat egin izanak ez duela esan nahi ondoren jasotako WhatsApp mezua benetakoa denik.
