Gorbeiako gurutzea konpontzeko lanak hasi dituzte, ehun urte baino gehiago dituen egituraren oinarria indartu eta egonkortzeko. Baina gurutzea leku berezi batean dago: Arabaren eta Bizkaiaren arteko mugan.
Orduan, nork ordainduko du konponketa?
Erantzuna erraza da: Arabak eta Bizkaiak erdibana.
Bi foru aldundiek 167.742,78 euro inbertituko dituzte guztira, BEZa barne, eta bakoitzak kostuaren %50 hartuko du bere gain. Hau da, gutxi gorabehera 83.871 euro aldundi bakoitzeko.
Gurutzea duela ehun urte baino gehiago jarri zuten Gorbeiako tontorrean. Denborarekin, mendizaleen zein animalien joan-etorriak, eta batez ere tontorreko eguraldi gogorrak, inguruko lurra higatu dute. Horren ondorioz, oinarriaren zati bat agerian geratu da eta egituraren zimenduak indartzea beharrezkoa izan da.
Lanek hilabete inguru iraungo dute. Denbora horretan, gurutzearen ingurua eta Ama Birjinaren eremua itxita egongo dira, baina Gorbeiako tontorrera igotzeko aukera mantenduko da, une jakin batzuetan segurtasunagatik murrizketak egin badaitezke ere.
Mendian gora doazenek, beraz, ezin izango dute gurutzera gerturatu, baina postontzia eta orientazio-mahaia erabiltzen jarraitu ahal izango dute. Azken hori dagoeneko konponduta dago.
Bi aldundien arteko akordioa ez da kasualitatea. Gurutzea bi lurraldeen arteko mugan bertan dago, eta Gorbeiako Parke Naturalaren eta Kontserbazio Bereziko Eremuaren barruan dago. Horregatik, Arabak eta Bizkaiak elkarlanean egitea adostu dute mantentze-lanak.
Beraz, oraingoan behintzat, ez dago eztabaidarik: Gorbeiako gurutzea Arabaren eta Bizkaiaren artean dago, eta konponketa ere bien artean ordainduko dute.
Fernando Vazquezen argazkia erabili dugu.