Ertzaintzak 20 eta 21 urteko bi gazte atxilotu ditu Gasteizen, irailaren 1eko gauean bi emakumeren aurka etxebizitza batean ustez egindako sexu-erasoengatik. Biak gaur, asteartea, jarri dituzte Gasteizko Guardiako Epaitegiaren esku.
Ertzaintzaren arabera, 44 eta 31 urteko bi emakume Gasteizko erdialdean zeuden irailaren 1ean, lo egiteko leku baten bila, eta bi gazteek euren etxera joateko aukera eskaini zieten.
Emakumeek gazteen gonbidapena onartu zuten eta etxebizitzara iritsi zirenean sexu-erasoak jasan zituzten, haien baimenik gabe.
Ertzaintzak handik egun batzuetara izan zuen gertatutakoaren berri, Gurutze Gorriaren Biktimei Arreta Emateko Zerbitzuaren bidez. Ikerketa abiarazi zuen Ertzaintzak eta ertzainek bi gazteak identifikatzea lortu zuten. Atzo atxilotu zituzten, bakoitzari ustezko sexu-eraso delitu bana egotzita.
Ertzaintzak jakinarazi duenez, bi atxilotuak magrebtar jatorrikoak dira eta aurretik hiru aldiz atxilotu edo ikertu dituzte.
Oharra: Informazio hau osatzeko Ertzaintzak berak zabaldutako bertsioa bakarrik erabili dugu.