Euskal Autonomia Erkidegoko Justizia Auzitegi Nagusirak (TSJPV) berretsi egin du Arabako Audientziak bikote bati ezarritako kondena, 80 urtetik gorako gizon bati 70.000 euro baino gehiago iruzur egiteagatik.
Bi akusatuei bi urte eta erdiko espetxe-zigorra eta 1.900 euroko isuna ezarri zieten. Horrez gain, 72.215 euro itzuli beharko dizkiote biktimari, eragindako kalteengatik.
Dena bi euroko eskaerarekin hasi zen
Epaiaren arabera, biktimak 2021ean ezagutu zuen emakumea, honek jateko bi euro eskatu zizkionean. Une horretatik aurrera, bien artean adiskidetasun-harremana sortu zen.
Hurrengo bi urteetan, emakumeakbehin eta berriro eskatu zion dirua gizonari, itzuliko ziola aginduta. Gizonak konfiantza izan zuen harengan eta hainbat diru-kopuru eman zizkion.
Epaileek frogatutzat jo dute, gainera, gizonak banku-txartela eman ziola emakumeari, eta hark bere bikotekidearekin batera eta modu koordinatuan, erosketak egin zituela eta dirua atera zuela.
Guztira, 70.000 eurotik gorako kaltea eragin zioten 80 urtetik gorako gizonari.
Bikoteak kondena errekurritu zuen
Bi kondenatuek Arabako Audientziaren erabakia errekurritu zuten TSJPVn. Besteak beste, errugabetasun-presuntzioa urratu izana eta iruzurra egiteko beharrezkoa den engainurik ez egotea alegatu zuten.
TSJPVk, ordea, argudio horiek baztertu eta Arabako Audientziaren kondena berretsi du.
Fiskaltzak sei urteko espetxe-zigorra eskatu zuen
Fiskaltzak ere helegitea aurkeztu zuen, baina kontrako norabidean: sei urteko espetxe-zigorra eskatu zuen bi kondenatuentzat.
Ministerio Fiskalaren arabera, gertakarien larritasun berezia eta konfiantzaz abusatzea kontuan hartu behar ziren, biktimaren adina eta bien artean sortutako konfiantzazko harremana direla eta.
TSJPVk, hala ere, eskaera hori ere baztertu du eta Arabako Audientziak frogatutzat jotako gertakariei eutsi die.
Epaia oraindik ez da irmoa, eta Auzitegi Gorenean errekurritu daiteke.