Udaltzaingoak bi gizon atxilotu ditu azken orduetan San Kristobal auzoan, bi kasu desberdinetan. Lehenengoa 50 urteko gizonezkoa da, bikotekideari eraso egitea egotzita, eta bigarrena 21 urtekoa, aitarekin izandako liskar baten ondoren.
Lehen atxiloketa gaur goizaldean, 02:30etik gutxira, gertatu da. Herritarren segurtasun-lanak egiten ari zen patruila bati Iruña-Veleia hiribidera joateko eskatu diote, auto baten barruan emakume bat larrituta zegoela ohartarazi ostean.
Udaltzainek bertara iritsi direnean, emakumea bakarrik aurkitu dute, aurpegian odolusten zuen zauri batekin. Emakumeak azaldu du bikotekideak eraso egin diola eta handik alde egin duela.
Emakumea artatu eta osasun-zentro batera eraman dute. Ustezko erasotzailea inguruan aurkitu eta atxilotu egin dute, genero-indarkeriaren esparruan lesio delitu bat egotzita.
Aitarekin elkarri eraso egin ondoren, semea atxilotuta
Bestalde, atzo eguerdi inguruan, beste gizon bat atxilotu zuten San Kristobal auzoan bertan. 21 urteko gazteari aitari lesioak eragitea leporatzen diote, biek elkarri eraso egin ondoren.
13:00ak pasatxo zirenean jaso zuen Udaltzaingoak 092 telefonoan etxebizitza batean liskar handia zegoelako abisua. Agenteek bi gizonekin hitz egin zuten eta, aitaren zauri larrien aurrean, semea atxilotu zuten.
Aita, era berean, gertatutakoagatik ikertzen ari dira.