NBAk Europako saskibaloiaren etorkizuna alda dezake, eta Baskonia erabaki horren erdian dago. Izan ere La Gazzetta dello Sport Italiako egunkariak aurreratu duenez, Euroligako kluben jabeek urriaren 5ean bilera egingo dute Como lakuan, lehiaketaren etorkizuna aztertzeko. Mahai gainean egon daiteke NBAk Euroliga erosteko eskaintza egitea.
Ez litzateke NBAk Europako saskibaloian interesa erakusten duen lehen aldia. Duela hilabete batzuk, NBAk Europan berezko liga bat sortzeko proiektua aztertu zuen, baina egitasmoak ez zuen behar adina talde erakarri eta azkenean atzera egin zuen. Horren ondoren, Euroligarekin beste bide batzuk aztertzen hasi da.
Orain, aukera bestelakoa izan daiteke: Euroliga bera eskuratzea. Horrekin batera, lehiaketak bere kabuz hazten jarraitzea eta 2027-28 denboraldirako 24 taldera iristea ere aztertzen ari da, frankizia-sistema baterantz eginez.
Horregatik, Baskoniak ere adi begiratu beharko dio mugimenduari. Gasteizko taldea Euroligako kluben artean dago eta lehiaketaren etorkizunean hartu beharreko erabakiek zuzenean eragingo diote Baskoniari.