Baskoniak eta Bilbao Basketek Euskal Kopako titulua jokatuko dute irailaren 15ean Mendizorrotzeko kiroldegi mitikoan. Partida 18:00etan hasiko da, hasieran aurreikusitakoa baino ordubete lehenago.
Partida 19:00etan jokatzekoa zen, baina Alavesek eta Valènciak 20:00etan jokatuko dute elkarren kontra, beraz hasiera ordua aurreratu egin da futbol partidarekin bat ez egiteko.
2020ko irailaren 5ean jokatu zen azken aldiz txapelketa Mendizorrotzan, orduko hartan Baskoniak Bilbao Basket gainditu zuen, 87-77.
Mendizorrotza, Baskoniaren etxe historikoa
Partidak badu osagai berezi bat. Mendizorrotza ez da edozein kantxa Baskoniarentzat. Buesa Arenara joan baino lehen Gasteizko taldeak urte luzez jokatu zuen bertan, eta klubaren historiako garai garrantzitsuenetako asko kiroldegi horretan bizi izan ziren.
Leongo azken partidaren ondoren, beste proba bat
Aurredenboraldiko azken neurketa Real Madrilen aurka Leonen (Espainia) izan zen eta madrildarrek garaipen erosoa lortu zuten, 121-80. Edonola ere kontuan izan behar da Baskoniak soilik lehen taldeko sei jokalari kantxaratu zituela.
Baskonia da Euskal Kopako nagusia
Baskoniak nagusitasun handia erakutsi du Euskal Koparen historian. Gorri-urdinek taldeak zazpi aldiz irabazi dutetitulua, eta Bilbao Basketek lau aldiz.
Sarrerak salgai
Partidarako sarrerak Euskal Federazioaren webgunearen bidez eskura daitezke 10 eurotan.