Eusko Jaurlaritzaren webgune nagusietako batzuk ez dira behar bezala funtzionatzen ari gaur goizetik. Euskadi.eus, Osakidetzaren eta Euskalmeten webguneak, edo Trafikoaren ataria, besteak beste.
Arazoa goizeko 06:30 inguruan hasi da, Euskadi.eus-en hodeiko azpiegituran izandako gorabehera baten ondorioz. Matxurak kate-erreakzioa eragin du azpiegitura horren mende dauden beste webgune batzuetan.
Hitzordu medikoak eta bestelako izapideak, kaltetuta
Gorabeherak herritarrei eragiten die, hainbat zerbitzu telematiko erabiltzea eragozten duelako. Besteak beste, Osakidetzan medikuarentzako hitzordua hartzea edo Trafikoaren bidez isunak ordaintzea ezinezkoa izan daiteke zerbitzuak berrezarri arte.
Lanbide eta Jaurlaritzaren beste atari batzuetan ere arazoak izan daitezke, azpiegitura informatiko partekatuen menpe dauden zerbitzuen arabera.
EJIEko teknikariak lanean ari dira zerbitzuak lehenbailehen berrezartzeko. Hala ere, Jaurlaritzaren arabera, normaltasuna berreskuratzeak hainbat ordu iraun ditzake.
