TUVISAren 11. autobus linea berriak harrera ona izan du martxan jarri eta lehen astean. Udalak jakitera eman duenez, lineak 3.483 erabilera erregistratu ditu lehen zazpi egunetan; hau da, egunean 500 bidaiatik gora, batez beste.
Linea uztailaren 23an jarri zen martxan, Zabalgana eta Lakua-Arriaga zuzenean lotzeko, hiriaren erdigunetik igaro beharrik gabe. Ibilbideak, gainera, Mariturri, Borinbizkarra, Sansomendi eta Txagorritxu ere lotzen ditu, eta ospitalera, autobus geltokira eta beste hainbat ekipamendutara iristea errazten du.
Autobusak 30 minutuko maiztasunarekin dabil asteko egun guztietan, eta linea sei hilabete inguruko probaldi gisa jarri da martxan. Denbora horretan, TUVISAk bidaiari kopurua, maiztasunen egokitasuna eta zerbitzuaren funtzionamendua aztertuko ditu etorkizunean hobekuntzak egin behar diren erabakitzeko.
Udalaren arabera lehen asteko datuek erakusten dute linea berriak herritarren behar bati erantzuten diola, eta auzoen arteko lotura zuzenagoa eskaintzen duela.