Gasteizek baditu jada 2026ko Andre Maria Zuriaren jaietako Edurne eta Zeledon Txiki. Aurtengo protagonistak Haizea Lauzurica eta Ekain González izango dira, biak 12 urtekoak, eta abuztuaren 7an haurrei eskainitako eguneko ekitaldi nagusian hartuko dute parte.
Haizea Bereziak kuadrillako neska da, eta Ekain, berriz, Los Desiguales kuadrillako blusa. Bi gazteek gaur jaso dituzte jaietan eramango dituzten aterkiak eta ardo-zahatoa, Maider Etxebarria alkatearen eta Sonia Díaz de Corcuera Kultura zinegotziaren eskutik.
Ekitaldian, alkateak zorionak eman dizkie eta “abentura” berezi honetaz gozatzeko deia egin die. Etxebarriaren hitzetan, bi gazteek jaiak «barru-barrutik sentitzen dituztenek bakarrik bizi duten erantzukizun eta ilusioarekin» biziko dute esperientzia.
Abuztuaren 7a Gasteizko jaietako egunik berezienetako bat da txikienentzat. Egun osoan zehar haurrei zuzendutako jarduerak, jolasak eta musika izango dira protagonista, eta Edurne eta Zeledon Txikik emango diote kolore berezia ospakizunari.