Gasteizko Batailaren monumentua zaharberritzeko eskaria itzuli da: 360.000 euroko lanak behar ditu
Gasteizko Batailaren monumentuaren zaharberritze integrala berriro jarri du mahai gainean PPk. Alderdiak Maider Etxebarriaren gobernuari eskatu dio monumentuaren narriadurarekin amaitzeko eta zaharberritze-lanen egutegia zehazteko.
Proposamena irailaren 25eko Udalbatzan eztabaidatuko dute. PPk eskatu du 2026a amaitu baino lehen jarduketen egutegi zehatza prestatzea eta lanak finantzatzeko Eusko Jaurlaritzarekin, Espainiako Gobernuarekin eta Arabako Foru Aldundiarekin harremanetan jartzea.
360.000 euroko zaharberritzea
Udalak 2024an monumentuaren kontserbazio-egoera aztertzeko ikerketa zientifikoa kontratatu zuen. Azterketaren emaitzak 2025eko urtarrilean aurkeztu ziren, eta monumentuak, oro har, egonkortasun-baldintza onak dituela ondorioztatu zuten, baina hainbat narriadura dituela, batez ere harrizko elementuetan.
Ikerketak zaharberritze integral bat proposatzen du. Lanek bost hilabete inguru iraungo lukete eta 360.000 euro inguruko kostua izango lukete.
Monumentua 1917ko abuztuaren 4an inauguratu zuten, 1813ko Gasteizko Bataila gogoratzeko. PPren arabera, azken esku-hartze sakonak 1963an eta 1984an egin ziren.
Orain, PPk Udal Gobernuari eskatu dio zaharberritzea noiz eta nola egingo den zehazteko, eta gainerako erakundeekin finantzaketa adosteko.
Irudian monumentua iazko martxoan, pintada batekin.