Errioxa kaleko 4. zenbakian urte luzez egon den «Prensa y Revistas Rioja» kioskoak ateak itxi ditu. Hirikoerdiguneak beste salmenta-puntu bat galdu du eta itxierak agerian uzten du paperezko prentsak azken urteotan izan duen gainbehera.
Kioskoak azken aldian beste funtzio bat ere hartu zuen: internet bidez egindako erosketak jasotzeko eta itzultzeko puntua bihurtu zen batez ere. Paperezko egunkari eta aldizkarien salmentak, ordea, gero eta leku txikiagoa du eguneroko kontsumoan.
Gero eta zailagoa da egunkaria erostea
Duela urte batzuk egunkaria erostea ohikoagoa zen hiriko kale eta auzoetan. Gaur egun, ordea, Gasteiz erdialdean bertan gero eta denda eta kiosko gutxiago daude prentsa eta aldizkariak erosteko.
Izan ere Internetek erabat aldatu du albisteak kontsumitzeko modua, telefono mugikorretik titularrak berehala irakurtzen dira, Gasteiz24 honetan, adibidez.
Horren ondorioz, paperezko egunkariaren ohitura ere gainbeheran doa.
El Correo Español egunkariaren adibidea
Aldaketa horren neurria ikusteko, El Correo Español egunkaria bera har daiteke erreferentzia gisa. Duela hamarkada eta erdi inguru, eskela gehien saltzen dituen egunkariaren paperezko hedapena 100.000 ale ingurukoa zen egunero edizio guztiak kontuan hartuta. 2011ko OJD datuen arabera, 102.379 aleko salmenta izan zuen batez beste.
Arabako edizioari dagokionez, garai hartan 17.000 ale baino gehiago saltzen zituen egunero. Gaur egun, ordea, kopuru hori nabarmen txikiagoa da.
Datu horiek erakusten dute aldaketa ez dela kiosko baten arazo partikularra: paperezko prentsaren kontsumo-ohiturak errotik aldatu dira azken urteotan.
Kioskoa desagertu da, baina oroitzapena geratu da
Itxieraren aurretik, dendak ohar bat jarri du erakusleihoan, urte hauetan guztietan bezeroen aldetik jasotako maitasuna eskertzeko.
Mezuan, dendak eskerrak eman dizkie urte hauetan guztietan bidelagun izan dituzten bezero eta pertsonei. Gauzak horrela, Errioxa kaleko kioskoaren itxierak ez du soilik prentsa saltzeko beste toki bat desagerrarazten. Kale horretako urteetako eguneroko bizitzaren zati bat ere ixten da.
